ޖަވާބު ދެއްވީ: الشيخ عبد الفتاح بن عبد الحميد رشدي
بسم الله الرحمن الرحيم ، الحمد لله رب العالمين، و الصلاة و السلام على رسول الله -صلوات الله و سلامه عليه- وعلى آله و صحبه أجمعين.
أما بعد:
حَيْضُ ގެ ލޭ ޢާންމުކޮށް އަންނަ ޢުމުރަކީ، ބާރަ އަހަރާއި ފަންސާސް އަހަރާއި ދެމެދެވެ. އަންހެނާގެ ޙާލަތާއި މާޙައުލާއި ޖައްވުގެ ގޮތުން މި ޢުމުރުގެ ކުރިން ނުވަތަ ފަހުންވެސް حَيْضُ ވެދާނެއެވެ.
މިމައްސަލާގައި ޢިލްމުވެރިންގެ މެދުގައި ޢިޚްތިލާފުވެފައިވެއެވެ. އަންހެނާ ޙައިޟުވާ ޢުމުރަކީ، ވަކި ޙައްދެއްގައިވާ ކަމެއްހެއްޔެވެ؟ އެ ޢުމުރުގެ ކުރިން ނުވަތަ އެ ޢުމުރުގެ ފަހުން ޙައިޟު ނުވާނެހެއްޔެވެ؟ އެ ޢުމުރުގެ ކުރިން ނުވަތަ އެ ޢުމުރުގެ ފަހުން އަންނަ ލެޔަކީ، ފަސާދަ ލޭ ހެއްޔެވެ؟ (މައްސަލާއިގެ އިޚްތިލާފު ބަޔާން ކުރެއްވުމަށްފަހު) الإمَامُ الدَّارِمِي -رحمه الله- ވިދާޅުވިއެވެ: “ތިމަންގެގާތުގައި މިއިން ކޮންމެ ބަސްފުޅަކީ ކުށެކެވެ. އެއީ، އެހުރިހައިކަމެއްގައި ބަލަންޖެހޭނީ، ލޭ ފެނުން ކަމުގައިވާތީއެވެ. ކޮންމެ ޙާލަތެއްގައި، ކޮންމެ ޢުމުރެއްގައި، ކޮންމެ މިންވަރަކަށް ލޭ ފެނުނު ނަމަވެސް، ޙައިޟު ކަމުގައި ބެލުން ވާޖިބުވާނެއެވެ -والله أعلم- ( المجموع شرح المهذب: 1/386).
الإمَامُ الدَّارِمِي -رحمه الله- ވިދާޅުވެފައިވާ ގޮތަކީ، މިމައްސަލާއިގެ ރަނގަޅުގޮތެވެ. އެއީ، شَيخُ الإِسْلَام ابن تَيْمِيَّة -رحمه الله- އިޚްތިޔާރު ކުރައްވާފައިވާ ގޮތެވެ. ނުވަ އަހަރުން ދަށު ކަމުގައިވިޔަސް ނުވަތަ ފަންސާސް އަހަރުން މަތި ކަމުގައިވިޔަސް، އަންހެނާގެ ފަރާތުން ލޭ ފެނިއްޖެނަމަ، އެއީ ޙައިޟުގެ ލެޔެވެ. އެއީ، ﷲ އާއި އެކަލާނގެ ރަސޫލާ ﷺ ޙައިޟުގެ ޙުކުމްތައް ގުޅުއްވާފައިވަނީ، ލޭ ފެނުން ކަމުގައިވާތީއެވެ. ﷲ އާއި އެކަލާނގެ ރަސޫލާ ﷺ ވަކި ޢުމުރެއް ކަނޑައަޅުއްވާފައެއް ނުވެއެވެ. ފަހެ، އެހެންކަމުން، އެކަމުގެ މައްޗަށް ޙުކުމްތައް ކަނޑައެޅުމަށްޓަކައި، ލޭފެނުމަށް ރުޖޫޢަވުން ވާޖިބުވާނެއެވެ. އަދި ވަކި ޢުމުރެއް ކަނޑައަޅާ ކަމުގައިވާނަމަ، އެކަމަށް ކީރިތި ޤުރްއާނާއި ސުންނަތުން ދަލީލު ބޭނުން ވާނެއެވެ. އެކަމަކަށް ދަލީލެއް ނެތެވެ.
والله تعالى أعلم. وصلى الله على نبينا محمد وآله وصحبه وسلم.